Desde comienso di siglo binti ta celebra carnaval na Aruba den e lunanan prome cu Diaranson di Shinishi. Carnaval ta un serie di celebracion/actividad festivo cu ta tuma luga net despues di e cambio di aña.

E prosperidad economico di e añanan trinta a contribui n’e crecemento di actividad social riba e isla. E prome celebracionnan di carnaval na Oranjestad tawata tuma luga den diferente club. Despues a cuminsa subi caya haciendo uzo di vehiculo decora cu rama di palma. Un par di participante disfrasa ta baila tras di e carosanan aki.

Despues cu e inmigrantenan fo’i Trinidad y e otro islanan Britanico di Caribe a establece nan mes na 1930 na Aruba, nan a cuminsa celebra carnaval na San Nicolas manera nan tawata tin custumber di haci esaki na nan pais. E prome parada di carnaval a tuma luga na San Nicolas na 1945. Tawata un grupo di inmigrante procedente di Trinidad y e otro islanan Britanico a tene un parada na honor di e triunfo dje aliadonan. Tres aña despues na augustus 1948 nan a haya permiso pa tene e parada den cayanan di San Nicolas. E biaha ey na honor di 50 aña di gobernacion di reina Wilhelmina. Disfrasa nan tawata baila riba musica di steelband.

Durante di e aña nan tawata celebra carnaval den tur districto riba e isla y ta na 1954 cu a cuminsa centralisa e actividadnan carnavalesco. Gobierno a institui Centrale Carnavalscommissie (CCC) y na 1966 a lanta Stichting Arubaans Carnaval (S.A.C.) pa organisa tur evento carnavalesco na Aruba.

 Oficialmente e temporada di carnaval ta cuminsa 11 di November pa diesun or di mainta.
Desde e prome siman di januari tin hopi actividad carnavalesco riba e isla. Carnaval ta cuminsa cu e Parada di Flambeu riba e prome diasabra despues di Aña Nobo cu ta cuminsa e ambiente carnavalesco. E parada masha popular aki ta duna di conoce cu e temporada di carnaval a cuminsa di berdad.

Fecha di Carnaval
E parada grandi di Carnaval cada aña ta cay riba un fecha diferente. E fecha di e parada grandi di Carnaval ta depende di e fecha di Diaranson di Shinishi (Ash Wednesday). Pasco di Resureccion ta determina e prome dia di carnaval. Diadomingo di resureccion ta e prome diadomingo despues di e prome luna yen na e comienso di primavera (21 di maart). Ta bay bek cu shete siman of conta cuarenta y shete dia bek, pa haya sa e prome dia di Carnaval. Oficialmente Carnaval ta cuminsa riba un diadomingo. Durante e añanan a establece diasabra como un extra dia di fiesta. Como cu Pasco di Resureccion por cay riba 22 di maart y mas tarda 25 di april kiermen cu ta celebra Carnaval entre e periodo di prome di februari y pa mas tarda 7 di maart. E parada grandi di Carnaval ta cay riba un diadomingo y e celebracion ta sigui te cu diamars, sigui pa Diaranson di Shinishi (e comienso di e cuaresma). Esaki ta un periodo den cual no ta come carni of come dimas. Durante e cuarenta dianan aki e curpa tin tempo pa sana su mes. Despues di e periodo di yuna ta bini Pasco di Resureccion, fiesta di paz, iluminacion, y resureccion di Hesus for di morto.

E parada grandi
E diadomingo prome cu Diaranson di Shinishi ta e culminacion di Carnaval, e parada Grandi na Oranjestad, cu su disfraznan cu ta hala atencion, bodypiece, roadpiece y carosa luhoso cu ta pasa den e cayanan di Oranjestad semper ta haya su aplauso di e mironesnan. E parada ta cuminsa depende con grandi e parada ta pa diesor of diesunor di mainta, encabesa pa e Reina di Carnaval y ta termina ora solo ta baha.

Stichting Arubaanse Carnaval (S.A.C.)
E organisacion di eventonan carnavalesco na Aruba tabata den man di e fundacion, Stichting Arubaanse Carnaval (S.A.C.). E fundacion S.A.C. a lanta na aña 1966 riba 11 di november pa diesun or di mainta y a stop di organisa carnaval na aña 2014.

Stichting Maneho di Aruba su Carnaval (SMAC)​
Entrante november 2014 Stichting Maneho di Aruba su Carnaval (SMAC) a keda lanta y ta encarga cu e organisacion di Carnaval. Tur aña riba 11 di november pa diesunor y diesun minuut e fundacion S.A.C. ta anuncia cu e temporada di carnaval a cuminsa. S.A.C. ta traha e programa p’e actividadnan y ta percura pa tur cos cana bon y sin complicacion. Na final di e temporada di carnaval S.A.C. ta parti premio, entre otro pa e miho grupo, miho road piece, miho body piece, miho carosa y e grupo cu mas ambiente. E tradicion aki a ser sigui pa S.M.A.C. tambe.

Figura carnavalesco
Carnaval conoce algun figura y actividad cu no ta cambia. Momo (e Rey di Carnaval of e Spirito di Carnaval), Prins y Pancho (e prins y e joker), Reinanan di Carnaval, Rey of Reina di Caiso, Soca y Tumba contest.

Varios eleccion ta tuma luga pa scoge e prins y panchonan, reinanan, cantantenan y musico/bandanan di carnaval. Por ehempel, Sra.Carnaval, exclusivamente pa e hende muhe di 35 aña bay ariba, y ta scoge e Prins y Pancho (e duo masculino mas chistoso). Pa e muchanan tambe tin varios eleccion por ehempel e Reina di Carnaval di Mucha/Reina Infantil, mescos ta conta pa Prins y Pancho Infantil di Aruba su Carnaval.